Maadhimisho ya Jubilei ya Dhahabu ya mwaka 2026 yanaadhimisha miaka 50 tangu mwaka 1976, mwaka ambao ujenzi wa Kanisa la kwanza ulianza rasmi na Kanisa likapewa jina la Mtakatifu Batholomayo na Askofu John Sepeku. Hata hivyo, mizizi ya huduma ya Ubungo inaanzia mwaka 1971. Hivyo historia ya Jubilei hii ni safari ya zaidi ya nusu karne ya imani, uinjilisti, kujitoa na maendeleo.<\/p>\n\n\n\n
Historia ya Mt. Batholomayo \u2013 Ubungo inaanzia mwaka 1971, wakati waumini wachache wa eneo la Ubungo walipoanza kukutana kwa ibada kwa kujiongoza wenyewe chini ya mti wa mwembe uliokuwa pembezoni mwa majengo ya Shule ya Msingi NHC. Miongoni mwa waumini wa mwanzo waliokuwa na maono ya kuanzisha huduma hiyo alikuwa Bwana Arthur Pauseki. Mwaka 1972, kundi hilo lilipata ruhusa ya kutumia darasa katika Shule ya Msingi NHC kwa ibada na shughuli za kiroho. Kumbukumbu inawataja pia Mary Kilowaka Mapunda, Mzee Martin Mvaa, Mzee Daniel Yona na Veronica Mpombo miongoni mwa waumini wa kipindi hicho.<\/p>\n\n\n\n
Mwishoni mwa Desemba 1972, waumini walimwona Canon Nathan Kipalamoto wa Kanisa Anglikana Kristo Mfalme Kinondoni na kumweleza kuhusu kundi lililokuwa likikusanyika Ubungo. Taarifa hiyo ilifikishwa kwa Askofu John Sepeku. Mwaka 1973, Ubungo ilianzishwa kuwa Kigango chini ya Kanisa Anglikana Kristo Mfalme Kinondoni. Canon Nathan Kipalamoto na Mapadre wengine waliendelea kutoa huduma za kiroho hadi mwaka 1975.<\/p>\n\n\n\n
Mwaka 1975, Robinson Crispo Komba aliteuliwa kuwa Mwinjilisti wa kwanza wa Ubungo. Katika mwaka huo huo, Kanisa lilipata kiwanja karibu na Shule ya Msingi NHC \u2013 eneo ambalo Mtaa wa Mt. Batholomayo ulipo sasa \u2013 ili kuondoka katika mazingira ya kuabudia darasani na kuwa na eneo maalumu la Kanisa.<\/p>\n\n\n\n
Mwaka 1976 ulikuwa hatua ya msingi katika historia ya Mtaa. Ujenzi wa jengo la kwanza la Kanisa ulianza rasmi, na Askofu John Sepeku akalipa Kanisa jina la Mtakatifu Batholomayo. Katika kipindi hicho pia ilijengwa nyumba ya kwanza ya watumishi. Awamu ya kwanza ya ujenzi ilikamilika mwaka 1978 na kuzinduliwa rasmi na Askofu John Sepeku. Hii ndiyo sababu mwaka 2026 unaadhimishwa kama Jubilei ya miaka 50 tangu kupewa jina la Mt. Batholomayo na kuanza kwa ujenzi rasmi wa Kanisa.<\/p>\n\n\n\n
Kutokana na ongezeko la waumini, mwaka 1981 iliamuliwa kupanua jengo la Kanisa la awali chini ya uongozi wa Canon Nathan Kipalamoto. Sambamba na huduma za kiroho, Mtaa ulihusika pia katika huduma za kijamii. Tangu mwaka 1980 kulikuwapo Zahanati ya Dayosisi katika eneo la Mtaa, iliyohudumia wakazi wa Ubungo na maeneo ya jirani. Zahanati hiyo ilibomolewa Aprili 2009, kwa kibali cha Askofu wa Dayosisi, ili kupisha ujenzi wa Kanisa jipya.<\/p>\n\n\n\n
Wazo la kujenga Kanisa jipya lilianza mwaka 2005 chini ya uongozi wa Canon Julius Kiondo, kutokana na ongezeko la waumini kiasi kwamba baadhi yao walilazimika kukaa nje wakati wa ibada za Jumapili. Ujenzi ulianza Aprili 2009 chini ya uongozi wa Rev. Amani Chitemo. Jengo hilo kubwa la kuabudia limekuwa mojawapo ya hatua muhimu za maendeleo ya Mtaa.<\/p>\n\n\n\n